БИШКЕК, 17-май — Sputnik. Бишкек шаарындагы автомектептин жетекчилиги кызматтык абалынан кыянаттык менен пайдаланып, чет элдик жаранга айдоочулук күбөлүктү мыйзамсыз берген деп шектелүүдө.
ИИМдин кызматкерлери УКМКнын өкүлдөрү менен биргеликте жүргүзгөн иш-чаранын жыйынтыгында кызмат абалынан пайдаланып, жасалма документтерди жасап жүргөн кызмат адамдарды аныктаган. Алар 2014-жылы автомектепти бүттү деп Түркиянын жаранына айдоочулук күбөлүк беришкен. Текшерүү учурунда белгилүү болгондой, автомектепте окуду деген учурда Түркиянын жараны өлкө тышында болгон.
Бирок, анын Кыргызстанда болбогону айдоочулук күбөлүк алууга эч кандай тоскоолдук жараткан эмес.
Аталган факты боюнча Бишкек шаарынын Октябрь райондук ИИБдин тергөө бөлүмү Кылмыш жаза кодексинин 221-беренеси (Коммерциялык же башка уюмдардын кызматчыларынын ыйгарым укуктарын кыянаттык менен пайдалануу) жана 350-беренеси (документтерди жасалмалоо) боюнча кылмыш ишин козгоду.
