Кыргызстандын түштүк аймагы — Ош облусу тууралуу эмнелерди билесиз? Оштун чок ортосунда Сулайман-Тоо жайгашканбы же түркүн-түстүү соода сатыгы жана жыты каңылжарды өрдөгөн мөмө-жемиштер базары орун алганбы? Салмагы жарым килого жакын самсаны жеп көрдүңүз беле? Ош облусун ошондой керемет кылган жүздөрү күнгө тотуккан жөнөкөй каармандар. Буларды фотограф Табылды Кадырбеков “чырк” эттирип алды.
Кыргызстандын аймактарындагы үрп-адаттар, жашоо-турмуш туурасында Sputnik агенттигинин "Кыргызстанга саякат" лонгридинен таанышсаңыз болот.
Базардагы жашоо ичиркенткен суук күндө да улана берет эмеспи. Энеси шам-шум эткенге чуркап кетип, уулу соода жайды күзөтүп турат
Кийиз шапке кийген жыгач уста биздин сүрөт бутага илингенин байкады окшойт...
Бала деген бала, керек болсо көчөдөгү токтоп калган сууну да майрамга айландырып жиберет
Ала кийизде отурган чоң эне. Кулагында алтын сөйкө жана колунда теспе
Куруттун даамы, ай!
Ош шаарынын көчөсү. Салт болуп калган түйүнчөк көтөргөн аял жана кымбат баалуу унаа катар келе жатат ...
Ой, жыргал! Сабакка бармай жок, каалаганча ойнойбуз, чоң атам менен чоң энем эч нерсе дебейт
"Соода менен оокат кылабыз. Неберелерим ачка калбайт", — дейт базарда отурган бул апа
Жолдон өтүп бара жаткан байке "эмне тартып жатасыңар" деп сурайын деди окшойт... бирок жолун андан ары улантты
Алай өрөөнүндөгү ат менен жаны бир болуп чоңойгон өспүрүм
Эшек менен өрүк ташыйбыз... Кыңылдап ырдап, кыйла ишти бүтүрүп келе жаткан бала
Жайлоодон салам! Бээ саап, кымыз жасап, курут жайып, ал тургай сары май алганга үлгүргөн жеңе уулу менен.
