БИШКЕК, 1-июл. — Sputnik. Массалык маалымат каражаттырында петроглиф түшүрүлгөн таштар уурдалды делген маалымат такталган жок. Бул тууралуу Ысык-Көл облустук ички иштер башкармалыгы билдирди.
Буга чейин Балыкчы шаарынын 30 чакырым алыс жакта жайгашкан петроглиф тартылган таштар уурдалды деген маалымат тараган.
"Аталган кабар боюнча иликтөө иштерин жүргүздүк. Таштар уурдалды деген маалымат такталган жок. Учурда облус боюнча Чолпон-Ата шаарында гана тарыхый эстеликтер бар. Алар атайын корукта", — деп айтылат маалыматта.
Ал ортодо Балыкчы шаардык мэриясына караштуу аппарат бөлүмүнүн башчысы Саламат Мукамбетов дагы уурдалды делген маалымат жок деген жооп узатты.
"Балыкчы шаарынын тегерегинде петроглиф түшүрүлгөн таштар уурдалды деген билдирүүнү тактай алган жокпуз. Биздин аймакта андай таштар жок. Балким Ысык-Көл районунда болушу мүмкүн. Ошол жак менен байланышкыла", — деди Мукамбетов.
"Биздин райондо андай таш жок, Чолпон-Ата шаарында гана бар. Башка петроглиф түшүрүлгөн таштар тууралуу уккан эмес экенмин", — деди аким.
Эске сала кетсек, массалык маалымат каражаттарында тараган кабарда алгач 500 таш табылганы, кийин 150 ташы жоголуп кеткени айтылган.
