БИШКЕК, 1-июл. — Sputnik. Баңгизатка каршы күрөшүү боюнча мамлекеттик кызматы тарабынан бир күн ичинде жалпы жонунан 18 килограмм нашаа жана 2 килограмм героин сактап жүргөн үч жаран алынды. Бул тууралуу аталган кызматтан билдиришти.
Маалыматка ылайык, үстүбүздөгү жылдын 30-июнь күнү Ош шаарындагы кафелердин биринин жанында 24 жаштагы тажик жараны кармалды. Аны тинтүү учурунда жанынан 14 килограмм 889 грамм нашаа алынган.
Ал эми 30-июндан 1-июлга караган түнү Бишкек шаарында 28 жаштагы калаа тургуну 2 килограмм 973 грамм нашаа менен кылтакка илинген.
Аталган иштер боюнча кармалган жарандарга карата Кылмыш жаза кодексинин 247-беренесинин (Баңгизатты жүгүртүү) негизинде кылмыш иши козголду.
Кылмышка шектүүлөр убактылуу кармоочу жайга киргизилди.
