ТИМ Стамбулдагы теракт боюнча: каттоодон өтүп жаткан КР жарандары жабыркашы ыктымал

БИШКЕК, 29-июн. — Sputnik. Кыргызстандын тышкы иштер министрлиги Түркиянын Стамбул шаарындагы "Ататүрк" аба майданында болгон жарылуудан жабыркагандардын арасында кыргыз жарандарынын бар жогун тактап жатат. Бул тууралуу министрликтин маалымат кызматы билдирди.

28-июнда жергиликтүү убакыт боюнча кечки 9:20да Стамбул шаарынын "Ататүрк" аэропортунда теракт болуп, 36 киши каза болуп, 150дөй киши түрдүү жаракаттарды алган. Өлкөнүн бийлиги куралдуу кол салууну "Ислам мамлекети" террордук тобу жасаганын айтууда. Аэропорттун эл аралык учуп-конуу залында эки ирет жана автоунаа токтотуу жайында бир жардыруу болгон. Бардык эл аралык каттамдар эртең мененки саат 8.00гө чейин токтотулган.

Министрлик жабыр тарткандардын арсында кыргызстандык жарандар бар болуп калышы ыктымалдыгын маалымдады.

"28-июнда саат 21.35те жана 00.35те Стамбул – Бишкек каттамы (ТК348 жана ТК344) бар болчу. Аларга каттоо 19.35те жана 22.35те башталган. Жабыр тарткандардын арасында каттоодон өтүп жаткан кыргызстандыктардын болушу ыктымал. Учурда аталган каттамда канча кыргыз жараны болгону такталып жатат", — деп билдиришти ТИМден.

Ошондой эле Стамбулдагы башкы консулдуктун өкүлдөрү кыргызстандык жарандарга тийиштүү жардамдарды берүү үчүн окуя болгон жерге барышкандыгын айтышты.

Түркиянын "Ататүрк" аэропортундагы жарылуу. Кырсык болгон жерден алынган сүрөттөрдү Sputnik Кыргызстандын фотолентасынан көрүңүз>>