БИШКЕК, 29-июн. – Sputnik. Түркиянын "Ататүрк" аэропортундагы түндө болгон терактыдан каза болгондордун арасында кыргызстандыктардын бар-жогу аныкталууда. Бул тууралуу КРдин Тышкы иштер министрлиги билдирди.
Эске сала кетсек, өлкөнүн "Ататүрк" аэропортундагы түндө болгон кол салуудан 36 киши өлүп, 100дөн ашыгы жаракат алган.
Түркиянын премьер-министри Бинали Йылдырым чукул маалымат жыйында каза болгондордун саны 36 экенин айтты. Ал ошондой эле терроризм жалпы адамзаттын балээси экенин, ал бүгүн дагы бир жолу айкындалып жатканын баса белгилеп, үч жан кечти өзүн жардырганын кошумчалады.
"Жжабыркагандардын арасында КР жарандарынын бар же жок экенин Кыргызстандын Түркиядагы элчилиги тактап жатат", — деп айтылат маалыматта.
Жергиликтүү ЖМКнын билдиришинче террористтер аэропортко такси менен келген.
