БИШКЕК, 24-июн. — Sputnik. Президент Алмазбек Атамбаев ШКУ мамлекет башчылар Кеңешинин кеңири курамдагы отурумуна катышып, талкууга жана кол коюуга сунуш кылынган документтерди Кыргызстан толук колдой тургандыгын билдирди. ШКУга Индия менен Пакистанды кабыл алуу боюнча меморандумга кол коюлду.
Президент кабыл алынып жаткан декларацияда ар тараптуу кызматташтыкты алга жылдыруу жана тереңдетүү үчүн биргелешип аракеттенүүгө умтулуу чагылдырылганын белгиледи.
"Кыргызстан аймакта туруксуздукка алып баруучу факторлор көбөйүп, террордук, экстремисттик топтор күчтөнүп жатканда кызматташтыктын маани-маңызы артты деп эсептейт", — деди мамлекет башчысы.
ШКУ өнүктүрүү банкын түзүүнү тездетүү маанилүү
Мамлекет башчысынын сөзү боюнча, бул түзүмдөр соода-экономикалык байланыштарды өнүктүрүүгө өбөлгө болот.
"ШКУ өнүктүрүү банкынын башкы кеңсеси Бишкекте болгону Кыргызстан үчүн принципиалдуу мааниге ээ экендигин эске сала кетким келет", — деп белгиледи Атамбаев.
Президент Жибек жолу экономикалык алкагын түзүү боюнча Кытай тараптын демилгесин иш жүзүндө алга жылдырууну тездетүү Кыргызстан үчүн маанилүү экендигин кошумчалады.
"Мен Кытай – Кыргызстан – Өзбекстан темир жолун долбоорлоону жана курууну тездетүү зарыл экенин айткан Кытай Эл Республикасынын төрагасын толук колдойм", — деди ал.
Атамбаев маданий жана гуманитардык кызматташуу ШКУ алкагындагы өз ара аракеттешүүнүн ажырагыс бөлүгү катары калуусу керек экендигин белгилеп, саммиттин катышуучуларын 2016-жылдын сентябрь айында Ысык-Көлдө өтө турган II Дүйнөлүк көчмөндөр оюнуна чакырды.
