БИШКЕК, 22-июн. — Sputnik. Ак-Төбө облусундагы 11-класстын окуучусу өзүн террористтердин тизмесинен таап алган. Бул тууралуу Новости — Казакстан "Диапозон" гезитине шилтеме берүү менен жазып чыкты.
Ак-Төбөдөгү окуядан кийин белгисиз адамдар теракт жасоого шектелгендердин тизмесин интернетке киргизип жиберишкен. Ал тизмеге Мартук районуна караштуу Байнасай орто мектебинин 11-классынын бүтүрүүчүсү Сагынган Сейткали кирип калган. Кийинчерээк анын ысымы ал тапшырууга камынып жаткан колледжге чейин жетип калган.
"Досторум мени менен мамилесин такыр үзүп, көпчүлүгү мени социалдык тармактардан өчүрүп салышты. Мен тизмеге кокусунан илинип калганымды аларга түшүндүргөн жокмун. Бул окуя мени абдан кайгыга салды", — деп окуучу ыйламсыраган.
Сагынгандын айтымында, ал апасы менен жашайт, атасы жок. Баланын күнөөсүз экенин далилдөө үчүн анын байкеси бардык инстанцияларга кайрылып жатканын билдирди. Эми күнөөсүз экенин далилдеген кагазды күтүшүп, теракт айынан каза болгондордун жакындарынын каарынан коркуп жатышканын билдиришти.
"Сагынган эмгекчил жана жоопкерчиликтүү окуучу. Ал кантип бул тизмеге түшүп калганы белгисиз. Айылдан эч жакка кеткен эмес. Бул жаңылыштык экенинен күмөнүм жок", — деп билдирди мектеп директору Виктор Мезенец.
Белгилей кетсек, 5-июнда Ак-Төбөдө радикалдар курал-жарак саткан эки дүкөнгө жана аскер бөлүгүнө кол салган. Анын кесепетинен сегиз киши каза болгон. Алардын үчөө аскер кызматкерлери экени айтылган. Акыркы маалыматтар боюнча 18 кылмышкер өлтүрүлүп, тогузу кармалган.
