БИШКЕК, 22-июн. — Sputnik. Премьер-министр Сооронбай Жээнбеков медицина тармагына кандай көңүл бурулса, ветеринарияга да ошондой деңгээлде маани берилиши керектигин Жогорку Кеңештин жыйынында билдиргенин өкмөттүн маалымат кызматы кабарлады.
Өкмөт башчы аталган эки тармактагы абалдан жарандардын ден соолугу көз каранды экенин белгиледи.
Анын айтымында, мал чарба продукциясын экспорттоону кеңейтүү жана анын сапатын жогорулатуу максатында өлкөнүн ветеринардык инфраструктурасын өнүктүрүүгө тийиштүү көңүл бурулушу тийиш.
Премьер-министр лабораторияларды куруу, реконструкциялоо жана модернизациялоо боюнча иш башталганын белгиледи.
Эске салсак, аймактык төрт ветеринардык лабораториянын курулушуна 37,3 миллион сом бөлүнгөн. Ошондой эле реконструкциялоонун биринчи этабы — Талас жана Ысык-Көл облустарындагы карантиндик фитосанитардык лабораторияларды жабдуулар менен камсыздоо жана кызматкерлерди окутууга 26 миллион сом каралган.
