БИШКЕК, 21-июн. — Sputnik. Токтогул районунун тушундагы Бишкек — Ош жолунда болгон жол кырсыгынан аралаш мушташ боюнча Азия чемпиону Мирбек Абдыкадыровдун каза болгонун Sputnik Кыргызстан агенттигине спортчу машыккан "Мухаммед-Умар" клубунан билдиришти.
Буга чейин ӨКМ Торкент айыл аймагынын тушунда болгон жол кырсыгына унаанын дөңгөлөгүнүн жарылышы себеп болгонун маалымдаган.
"Honda Stepwgn" унаасынын дөңгөлөгү жарылып, машина аласалып кеткен. Салондо 8 киши болгон. 27 жаштагы айдоочу менен 36 жаштагы бир жүргүнчү ооруканадан көз жумган. Дагы эки киши ооруканада дарыланып жатат", — деп айтылат билдирүүдө.
"Мухаммед-Умар" клубунун менеджери Арыпбек Айтбаев өз сөзүндө Абдыкадыров 2013-2014-жылдар аралыгында аралаш мушташ боюнча Кыргызстандын чемпиону болгонун белгиледи.
"2015-жылы ММА турниринин жыйынтыгы менен Азия чемпиону болгон. Артында кичинекей кызы калды", — деди ал.
Спортчунун сөөгү бүгүн кичи мекени Өзгөн районунда жерге берилди.
