БИШКЕК, 21-июн. — Sputnik. Премьер-министр Сооронбай Жээнбеков бүгүн, 21-июнь күнү Жогорку Кеңешинин конституциялык мыйзамдар, мамлекеттик түзүлүш, сот-укуктук маселелер жана регламент боюнча комитеттин жыйынында өкмөттүн түзүмдүк өзгөрүү боюнча сунушу менен тааныштырат. Бул тууралуу өкмөттүн маалымат кызматы билдирди.
- Эскерте кетсек, премьер-министр өкмөттүн түзүмүнө төмөнкүдөй өзгөртүүлөрдү сунуштоодо:
Геология жана минералдык ресурстар боюнча мамлекеттик агенттиктин базасында Мамлекеттик өнөр жай, энергетика жана жер казынасын пайдалануу комитетин түзүү;
Айыл чарба жана мелиорация министрлигинин функцияларын азык-түлүк өнөр жайын өнүктүрүү боюнча кошумча функциялар менен толуктоо;
Мамлекеттик байланыш агенттиги жана Электрондук башкаруу борборунун базасында Мамлекеттик маалыматтык технологиялар жана байланыш комитетин түзүү;
Экономика министрлигин, Транспорт жана коммуникациялар министрлигин, Мамлекеттик каттоо кызматын, Геология жана минералдык ресурстар боюнча мамлекеттик агенттикти кайрадан түзүү жана функцияларын кыскартуу;
Экологиялык жана техникалык коопсуздук боюнча мамлекеттик агенттиктин функцияларын жер казнасын пайдаланууну көзөмөлдөө боюнча функцияны кошумчалоо жолу аркылуу кеңейтүү.
Бийликтин аткаруу бутагынын түзүмүнө киргизилүүчү өзгөртүүлөр штаттык санды көбөйтүүнү жана республикалык бюджеттен кошумча каржылоону талап кылбайт.
Парламенттин тармактык комитетинин жыйынына өкмөттүн бардык мүчөлөрү катышат.
