БИШКЕК, 19-июн. — Sputnik. Тажикстандын күч кызматкерлери жума күнү Хожент шаарындагы абактан качып кеткен кылмышкерди кармады. Бул тууралуу РИА Новости жазып чыкты
Укук коргоо органынан билдиришкендей жума күнү үч кылмышкер абактан качууга аракет жасашкан. 30 жаштагы Мирзо Каюмов Ирактагы согушка катышканы үчүн былтыр декабрда 14 жылга эркинен ажыратылган. Ал эми 35 жаштагы Хабибжон Юсупов 2013-жылдын соңунда акча алмаштыруучу жайдын кызматкерин өлтүргөнү үчүн 20 жылга соттолгон. Дагы бир 28 жаштагы кылмышкер Рамзуллохон Додохонов Пакистандын Вазиристан аймагындагы согуштук аракеттерге катышканы үчүн мындан үч жыл мурун 20 жылга эркинен ажыратылган.
Кылмышкерлер качып бара жатканда Каюмов абактын күзөтчүлөрү тарабынан атып өлтүрүлгөн. Кийинчерээк оор жаракат алган Юсупов кармалган. Додохонов ок жегенине карабастан качып кетүүгө үлгүргөн. Тажикстандын Улуттук коопсуздук комитетинин биринчи орун басары Мансуржон Умаров РИА Новости агенттигине абактан качкандар Афганистандын аймагындагы террордук топтордун бирине кошулууну көздөшкөнүн билдирди.
Маалыматка ылайык Додохонов 19-июнда саат 11.30да күч кызматкерлери тарабынан кармалган. Ал ок чыгарып каршылык көрсөткөн.
