БИШКЕК, 19-июн. — Sputnik. Мындан эки күн мурун Тажикстандын түндүк тарабындагы Хожент шаарындагы абактан качууга аракет кылгандар Афганистандын аймагындагы террористтик топко кошулууну көздөшкөн. Бул тууралуу өлкөнүн улуттук коопсуздук комитетинин төрага орун басары Мансурджон Умаровго таянуу менен РИА Новости билдирди.
"17-июнь күнү кечинде алар алдын ала сүйлөшүп 52 жаштагы полковник Ермамад Алимамадовго кол салышкан. Ал эми Мирзо Каюмов бир нече ирет моюнга сайып, балка менен башка урган. Полковник ооруканадан каза болду", — деди ал.
Умаровдун айтымында, полковникти өлтүргөндөн кийин кылмышкерлер түрмөнүн дубалынан секирип өтүүгө аракет кылышкан.
"Качкындарды байкап калган күзөтчүлөр ок чыгарышкан. Натыйжада Каюмов өлтүрүлүп, Юсупов жарадар болгон. Ал эми Додохонов алган жараатына карабай из жашырып кетүүгө үлгүргөн", — деди ал.
Умаров дал Юсупов кылмышкерлердин планы тууралуу айтып бергенин белгиледи.
Учурда из жашырып кеткен Додохонов өтө кооптуу кылмышкер экени белгиленүүдө.
Издөөгө алынган кылмышкер тууралуу маалымат бергендерге акчалай сыйлык убадаланды.
