БИШКЕК, 19-июн. — Sputnik. "Эйр Манас" авиакомпаниясы Европа биримдигинин "кара тизмесинен" чыгууну пландап жатканын Жарандык авиация агенттигинин директору Эрмек Өмүралиев Sputnik Кыргызстан агенттигине билдирди.
Ал 2006-жылдан тарта Кыргызстандын аймагында катталган бардык авиакомпаниялар Европа биримдигинин "кара тизмесине" киргенин айтат. Аларга ЕБдин аба мейкиндигине кирүүгө тыюу салынган. Жаңыланган тизмеде ата мекендик 13 авиакомпания бар. ЕБдин аймагына кирүү үчүн "Эйр Манас" компаниясы эксплуатациялык коопсуздук аудитинен (IOSA) өтүүга даярданууда. Аны эл аралык аба транспорту ассоциациясы (ИАТА) жүргүзөт.
"Быйыл жыл аягына чейин же кийинки жылы текшерүүдөн өтүү пландалууда. Эгер "кара тизмеден" чыкса Европага аба каттамдарды жасоого уруксат берилет" — деди Өмүралиев.
Анын айтымында, тыюу салынган тизмеден чыгуу бир катар артыкчылыктарды берет. Анын ичинде учактардын лизинги арзандап, камсыздандыруу төлөмдөрү азаят.
