Быйыл туристтик мезгилде 2800 милиция кызматкери эс алуучулардын коопсуздугун камсыз кылат.
БИШКЕК, 18-июн. — Sputnik. Ички иштер министри Кашкар Жунушалиев милиция кызматкерлеринин быйылкы туристтик сезонго карата даярдыгы менен таанышты. Бул тууралуу ИИМ билдирди.
Бүгүн, 18-июнда Чолпон-Ата шаарында Ысык-Көл облустук ички иштер башкармалыгынын саптык тизими өттү.
Быйыл туристтик мезгилде 2800 милиция кызматкери эс алуучулардын коопсуздугун камсыз кылат.
"Туристтик сезон убагында милиция кызматкерлери эс алуучуларга сылык мамиле жасап, алардын коопсуздугун камсыздоосу зарыл. Тартипти катуу сактап, кылмыштуулук менен күрөшүү керек. Келген коноктордун коопсуздук жактан көйгөйү жаралбасын", — деди министр.
Быйыл туристтик мезгилде 2800 милиция кызматкери эс алуучулардын коопсуздугун камсыз кылат. Милиция кызматкерлеринен сырткары дагы 600 ыктыярдуу элдик кошуундар коомдук тартипке көз салат.
Маалыматка ылайык, учурда республика боюнча 284 курорттук-саламаттык сактоо мекемелери бар.
ИИМ быйыл эс алуучулардын коопсуздугу үчүн Тоң районунун Бөкөнбаев айылында милиция бөлүмү, ал эми Бишкек — Торугарт жолунун 138-чакырымындагы "Кувакы" ашуусунда аймактык милиция пункту ачыларын белгилейт.
Мындан сырткары, учурда 32 курорттук-саламаттык сактоо мекемелеринде 187, облустун жолдоруна 81 видеокамера орнотулган.
