БИШКЕК, 17-июн. — Sputnik. Талас облусунун Бакай-Ата районундагы Ак-Дөбө айылындагы Талас — Тараз — Суусамыр кан жолундагы көпүрө катуу кирген суудан улам жабылганын ӨКМдин Бакай районунундагы бөлүм башчысы Кочкорбек Качыбеков Sputnik Кыргызстан агенттигине билдирди.
Маалыматка ылайык, Кызыл-Сай – Суусамыр жолундагы көпүрөнү кирген суу алып кетүү коркунучу тууралуу билдирүү түшкөн.
"Райондун жарандык коргоо кызматы келип, алдын алуу иштерин жүргүздүк. Бирок суу катуу киргендиктен жээкти бекемдөө аракеттеринен майнап чыккан жок, суунун агымы аны улам алып кетип жатты. Көпүрөнүн жанында кошумча лоток бар болчу, суунун көлөмүн азайтуу үчүн аны ачууга туура келди. Көпүрөнү тиреп турган бир түркүк кыйшайып калган. Ошентсе да көпүрөгө коркунуч жок", — дейт ал.
Учурда суунун көлөмү 75 куб метрге жеткен, буга чейин ал 25-30 куб метрди гана түзүп келген.
Белгилей кетсек, акыркы жумада нөшөрлөп жааган жаандан улам Кыргызстандын бир катар аймактарында дарыялар нугунан чыгып, Нарын, Ысык-Көл облустарында сел жүргөн. Учурда жаратылыш кырсыктарынын алдын алуу боюнча ӨКМ керектүү аракеттерди көрүп жатат.
