БИШКЕК, 16-июн. — Sputnik. Жогорку Кеңештин алдында жергиликтүү тургундар митинг өткөрүштү. Катышуучулар "паралеллдүү долбоорлоо" боюнча мыйзам долбооруна каршы чыгып жатышканын Sputnik Кыргызстан агенттигинин кабарчысына билдиришкен.
Акцияга онго жакын адам чогулган. Укук коргоочу Анара Дауталиеванын айтымында, жарандар аталган мыйзам долбоорго каршы чыгып жатышат. Шаршемби күнү депутаттар мыйзам долбоорго биринчи окууда каршы добуштарын беришкен. Бирок депутаттардын бири аны кайра добушка коюну талап кылышууда.
"Жогорку Кеңештин регламенти бузулуп жатат. Паралеллдүү долбоорлоо мыйзам долбоору курулуш компанияларынын кызыкчылыгына иштеп жатат. Мыйзамга ылайык үйлөрдү салуудан мурда долбоорду даярдап, уруксат алып, бардык процедуралардан өткөндөн кийин куруу иштери башталышы керек. Азыр болсо курулуш иштерин баштап, долбоорлоо иштерин паралеллдүү жүргүзө берүү сунушталып жатат. Экспертиза жүргүзүлбөгөндөн кийин акча менен убакыт үнөмдөлөт. Бирок жарандардын коопсуздугун эстен чыгарбаш керек. Алар кандай курулуш материалдарын колдонуп жатканын биз кайдан билмек элек", — деп билдирди Дауталиева.
Укук коргоочу белгилегендей буга чейин аталган мыйзам долбоорду кабыл алдырууга аракеттер болгон.
