БИШКЕК, 14-июн. — Sputnik. "Жеткиликтүү турак жай – 2015-2020" программасынын алкагында 31 мугалим үйлүү болду. Бул тууралуу Билим берүү жана илим министрлиги билдирди.
Маалыматка ылайык, Бишкекте 2, Ош шаарында 5, Ош облусунда 2, Жалал-Абад облусунда 10, Чүй облусунда 2, Баткенде 3, ал эми Ысык-Көлдө 7 адам турак жайлуу болгон.
Насыяны медицина кызматкерлери, мугалимдер жана социалдык кызматкерлер ала алат. Алардын жаш курагы 21ден кем болбошу зарыл. Аталган кесиптер боюнча эмгек стаж үч жылдан кем эмес болуп, алардын ичинен жок дегенде бир жыл акыркы иш ордунда эмгектениши керек. Өкмөт келечекте ипотека алуучулардын тизмесин кеңейтүүнү пландап жатат. Алардын ичинен көп балалуу бүлөлөр, мамлекеттик же кызматтык милдеттерин аткаруу учурунда курман болгондордун туугандары артыкчылык укукка ээ болушат.
