БИШКЕК, 12-июн. — Sputnik. Депутаттардын тобу никеге туруу үчүн кыздарды зордуктагандарга карата жазаны күчөтүү демилгесин көтөрдү.
Мыйзам долбоорунун демилгечилеринин бири Рада Туманбаеванын айтымында, 2015-жылы эрезеге жетелек балдарга каршы жасалган 185 кылмыш катталып, медициналык мекемелерге зордукталуу фактысы боюнча 164 бала кайрылган.
"Ошондон улам, никеге туруу үчүн кыздарды зордуктагандарга карата 10 жылдан 15 жылга чейинки жаза чаралары сунуш кылынууда", — деди Туманбаева.
Ал эми эл өкүлү Өмүрбек Бабанов кыз зордукталса кылмыш кылган балага үйлөнтүп коюп, ал жазасыз калган учурлар көп экенин айтат. Андыктан депутат мындайга жол бербөө керектигин баса белгиледи.
