БИШКЕК, 2-июн. — Sputnik. КР Мамлекеттик каттоо кызматы жарандык документтердеги каталар жөнүндө айрым ЖМКларга чыккан маалыматтарга жооп кайтарды.
Айрым маалымат каражаттары буга чейин никени күбөлөндүрүү, туулгандыгы жөнүндөгү документтердин аты-жөнү көрсөтүлгөн жердеги жазууларда одоно ката кеткенин жазып чыгышкан.
Мамлекеттик каттоо кызматынын маалымат катчысы Мелис Эржигитовдун айтымында, аталган документтердин бет ачарына журналисттер чакырылган.
"Жаңы документтердин бет ачары болуп жатканда биз журналисттерге каталар кеткенин айтып, ага көңүл деле бурбоону суранганбыз. Документтин сырткы көрүнүшүн жана колдонулган шрифтти көрсөтөлү дегенбиз. Бирок айрым журналисттер кетирилген каталарды биз байкабай калган сыяктуу кылып маалымат таратышты", — дейт Эржигитов.
Буга чейин Мамлекеттик каттоо кызматы колго толтурулган айрым документтерди жасалмалоо оңой болгондуктан аларды жакшыртуу боюнча аракеттерди көрүп жатканын маалымдаган. Жаңы бланкалар "А" деңгээлиндеги коргоого алынган, алар электрондук гана түрдө толтурулат.
