БИШКЕК, 1-июн. — Sputnik. Эртең, 2-июнда өлкө аймагында ылдамдыгы секундасына 20 метрге чейин жеткен шамал болот. Бул тууралуу Кыргызгидромет билдирди.
Маалыматка ылайык, 2-июнда кээ бир райондордо өткүн өтүп, күн күркүрөйт, батыштан соккон шамалдын ылдамдыгы секундасына 4-9 метрден, айрым жерлерде 15-20 метрге чейин жетиши мүмкүн.
Бишкек шаарында күн 32 градуска чейин ысыса, Ош шаарында 33 градус ысык болот.
Кыргызгидромет ошондой эле 2-6-июнда күтүлүп жаткан нөшөрлүү аба ырайына байланыштуу республиканын тоолуу аймактарында жана тоо этектеринде сел жүрүшү мүмкүндүгүн эскертет.
