БИШКЕК, 30-май — Sputnik. Жекшембиден дүйшөмбүгө караган түнү Германиянын түштүк аймагында суу ташкын болуп, андан кеминде төрт киши каза болгонун РИА Новости Bild басылмасына шилтеме берүү менен билдирди.
Баден-Вюртемберг аймагындагы Швебиш-Гмюнд шаарындагы гаражга толгон суудан кишилерди куткаруу учурунда адам өмүрү кыйылган. Жергиликтүү бийликтин маалыматына ылайык, каза болгондордун арасында куткаруучулар да бар.
Welt гезитинин маалыматы боюнча Германиянын түштүгүндө орун алган Баден-Вюртемберг аймагында болгон суу ташкындан улам жашоочулар башка жакка шашылыш көчүрүлгөн. Полиция жарандардан бир түндө эле 500 чалуу болгонун билдирүүдө. Суунун деңгээли 1,7 метрге чейин жетти.
