БИШКЕК, 26-май — Sputnik. АКШнын Бишкек шаарындагы элчилик имаратынын алдына насыя алгандардын укугун коргогон Элдик кыймылдын тарапташтарынын митинги өтүп жатат.
Акцияга болжол менен 300дөй киши чогулган. Алар колдоруна транспаранттарды кармап турушат, анда "Насыя алгандардын укугун ким коргойт?" деген жазуулар жазылган.
Чогулгандар банктар менен чакан насыя компаниялардын элди колдонгонуна нааразычылыгын билдирүүдө.
Буга чейин насыя алгандардын укугун коргогон Элдик кыймыл АКШ элчиси Шейла Гуолтниге арыз менен кайрылышкан. Анда коммерциялык банктар менен чакан насыя компаниялары адам укуктарын бузуп жатканы жазылган. Элдик кыймылдын өкүлдөрү адамдардын укугун тебелеген уюмдар АКШнын FINCA, Mercy Corps, ACDI/VOCA жана USAID уюмунун колдоосу менен түзүлгөнүн айтышууда.
