БИШКЕК, 25-май — Sputnik. Шаршемби күнү Ош, Жалал-Абад жана Ысык-Көл облустарындагы жергиликтүү кеңешке шайлоо өттү. Бул тууралуу Борбордук шайлоо комиссиясынын маалымат кызматы билдирди.
Ош облусунун Өзгөн районундагы Кызыл-Октябрь айылынын башчысы болуп Эржигит Пасанов шайланды. Ага биринчи турда 9 депутат добуш берсе, экинчи турда 12 депутат "макул" деген добушун берген.
Жалал-Абад облусундагы Майлуу-Суу шаарынын мэри болуп "Республика – Ата-Журт" партиясынан көрсөтүлгөн Нурадил Маматов шайланды. Анын талапкерлеригин биринчи турда эле 31 депутат колдоого алган.
Ысык-Көл облусунун Балыкчы шаарынын депутаттары Алмаз Мамбетовду калаа башчылыкка жактырышты.
Ошондой эле Ош шаарынын мэрлигине кайтадан Айтмамат Кадырбаев шайланды. Анын талапкерлигин 41 шаар депутаты колдогон.
Ал эми Токмок шаарынын мэрин шайлоо депутаттардын кворуму жоктугунан болбой калды.
