БИШКЕК, 24-май — Sputnik. Жаш акындардын айтышында баш байгеге Кубат Тукешов ээ болгонун иш-чараны уюштуруучулардын бири "Ыйман" фондусу билдирди.
Мелдештин жыйынтыгы боюнча баш байгени Кубат Тукешов багындырса, биринчи орунга Жылдызбек Төрөканов, экинчи орунга Гүлмира Айбаш кызы жана Жамайка Токонова, ал эми үчүнчү орунга Мамбеторозо уулу Мамбеттокто ээ болушту.
Калыстар тобу жыйынтык чыгарып жатып, жаш акындардын профессионалдуулугун, чеберчилигин белгилеп өтүштү.
"Өз заманынын залкары болгон Эстебес, Ашыралы, Тууганбай жана Замирбектер да өнөр сересине дал ушинтип баш баккан. Алардын жолун улап Элмирбек, Жеңишбек, Амантай, Аалы, Азаматтар чыкса, эми минтип ошол улуу жолду улап акындардын дагы бир сүрмө тобу келе жатат", — деди калыстар тобунун мүчөсү, "Маданият, тарых жана тил" телеканалынын башкы редактору Гүлмира Кулумбаева.
Ал эми белгилүү акын Карбалас Бакиров айтыш атадан калган улуу өнөр экенин айтып, улуудан калган өнөрдү минтип жаш төкмөлөрдүн улантып жатканы жакшы жышаан экенин белгиледи.
"Илгери элдин жарпын жазып, ошол эле учурда рухий азык берген дал ушул акындар болгон. Биздин азыркы акындар да ушул улуу вазийпаны моюнуна алып жатканы чоң эрдик", — деди ал.
Эске сала кетсек, ушул эле айтыш 25-майда Нарын шаарында, 26-28 май күндөрү Жалал-Абад облусунда өтмөкчү.
