БИШКЕК, 23-май — Sputnik. Түркиянын жаңы премьер-министри болуп транспорт, кеме жүргүзүү жана байланыш министри Бинали Йылдырым дайындалды. Бул тууралуу Sputnik Türkiye маалымат агенттиги билдирди.
Түркиянын учурда бийликтеги "Адилет жана өнүгүү партиясы" (АК) өзүнүн жаңы лидерин кезексиз жыйында шайлады. Анын талапкерлигин 1470 делегаттын 1405и колдогон.
Акыркы учурларда Давутоглу менен Түркиянын президенти Эрдогандын ортосунда пикир келишпестиктер болгонун бир катар ЖМКлар жазышууда. Өзгөчө күрд маселеси жана өлкөдөгү журналисттердин кармалышы боюнча өкмөт башчы менен президенттин көз караштары эки ача болуп чыккан.
Партиянын ички тартиби боюнча бийликтеги партиянын лидери премьер-министр болуп шайланат.
Жаңы дайындалган өкмөт башчы 1955-жылы туулган. Стамбул техникалык университетинин кеме куруу факультетин аяктаган. Ушул эле окуу жайдан диссертациясын жактаган. Стамбул мэриясында жүргүнчү жана паромдук ташуулар боюнча дирекциясында иштеген. 2002-жылы "Адилет жана өнүгүү партиясынан" депутат болгон. Ал 13 жыл бою транспорт министрлигин жетектеген.
Ал ортодо кызматтан бошотулган Давутоглу өзүнүн Twitter баракчасындагы "премьер-министр", "партия лидери" деген наамдарын өчүрдү.
