БИШКЕК, 22-май — Sputnik. Афганистан премьер-министри Абдулла Абдулла "Талибан" кыймылынын башчысы молдо Ахтар Мансур АКШнын аба соккусунан өлгөн болушу керек деди. Бул туурасында РИА Новости Рейтер агенттигине таянып билдирди.
Буга чейин талиптердин лидерин жок кылган абадан урулган сокку ишемби күнү түшкө жуук Пакистандын Ахмад-Валь шаарында жасалган деген маалымат тараган. Ал Афганистанга жакын чек арада болгон. Бомбалоону учкучсуз башкарылган америкалык бир нече аба техникалары жасап, бутага согушкерлер түшкөн автоунаа алынган.
"Өткөн түнү АКШнын администрациясынын өкүлдөрү бул туурасында Афганистандын өкмөтүнө кабарлашты. Мансур молдо чындыгында эле жок кылынган окшойт. Кошумча маалыматтарды аларыбыз менен жалпы элге билдиребиз", — деген Афганистан премьер-министри.
Ал эми Пентагондун өкүлү Питер Кук аскердик операциянын жыйынтыгы чыгып жаткандыгын жана анын майда-чүйдөсү кийинчерээк билдирилерин айтты.
