БИШКЕК, 21-май — Sputnik. Кыргызстанда мамлекеттик кызматта иштеп жүргөн, тажрыйбалуу кадрларды гана премьер-министрликке, өкмөткө жана ведомство жетекчилигине алуу сунушталып жатат. Мындай маанидеги мыйзам долбоору коомдук талкууга чыгарылды.
Мыйзам долбоорунун демилгечиси депутат Акылбек Жапаров жогорку эшелондогу чиновниктерге квалификациялык жана кесиптик талаптар коюлбагандыктан, министрлердин кабинети тез-тез өзгөрүп реформа жүргүзүлбөй жатканын билдирген.
"Премьер-министрликке, өкмөт мүчөлүккө жана ведомство башчысы болом деген жарандарга кесиптик талаптарды катуулатуу керек. Жогорку кызматка келе турган адам кыргызча жана орусча мыкты сүйлөп, тийиштүү тармактагы кесиптик тажрыйбасы 10 жылдан кем эмес болуусу керек", — деп айтылат мыйзам долбоорунда.
Мындан сырткары талапкерлерге мамлекеттик же, муниципалдык кызматтарда беш жылдан кем эмес иштөө тажрыйбасынын болушуна милдеттендирген талаптарды коюу сунушталган. Тагыраагы, талапкерлер буга чейин саясий, жогорку жана административдик кызматтарда иштеген болуусу керек.
