БИШКЕК, 21-май — Sputnik. Кыргызстандын тышкы иштер министри Эрлан Абдылдаев Сингапурдан келген делегацияны кабыл алды. Бул тууралуу министрликтин маалымат кызматынан билдиришти.
Маалыматка ылайык, Сингапурдун делегациясы ЕАЭБ өлкөлөрү менен эркин соода жүргүзүү келишимин талкуулоо үчүн келишкен.
Жолугушууда эки өлкө ортосундагы мамилелер жана аларды жакшыртуу маселелери талкууланды.
Соода-сатык жана өнөр жай министри Ко По Кун башында турган делегация Кыргызстан менен болгон саясий, экономикалык жана маданий-гуманитардык мамилелерди өрнүктүрүүгө кызыктар экенин билдирген.
Эки тарап мамлекеттик башкаруу, инвестиция, туризм жана атайын кызматтар багытында тажрыйба алмашуу маселелерин дагы талкуулашкан.
