БИШКЕК, 19-май — Sputnik. Азиздер жана дүлөйлөр коомунун мүчөлөрү дүйшөмбүдөн тарта Ак үй алдына митингге чыгып, батирлерди бөлүштүрүүнүн мыйзамдуулугун текшерүүнү талап кылышууда. Бул тууралуу Sputnik Кыргызстан агенттигине аталган коомдун төрагасы, азиз, биринчи топтогу майып Алтынбек Тобокел уулу билдирди.
Анын айтымында, 2008-жылдан бери республикалык бюджеттен көрүүсү жана угуусу начар жарандар үчүн 225 батир курулган.
"Бирок мындан биздин жетекчилик гана пайда көрдү. Андан да бул алардын экинчи, үчүнчү турак жайы. Керек болсо коомдун төрагасы Калык Мамбетакуновдун туугандары да үйлүү болушту. Жаңы турак жайга ээ болгондордун арасында коомубуздун алдындагы ишкана жетекчилери бар. Алардан сырткары, алты саны аман катчы жана вице-президент да аталган үйдөн батирлүү болду", — деди Тобокел уулу.
Ал батирлердин адилетсиз бөлүштүрүлүшү боюнча бардык инстанцияга — соттордон баштап Жогорку сотко чейин кайрылганын айтып, эч натыйжага жетишпегенин белгилейт.
"Эми биз президентке кайрылып, чоң ишеним артып турабыз. Турак жай алуунун мыйзамдуулугун текшерген комиссия түзүлүшүн талап кылабыз", — деди ал.
Тобокел уулу мындай көйгөйлөр 90 батир курулган Ош менен Жалал-Абадда да бар экенин белгилейт.
Өз кезегинде Азиздер жана дүлөйлөр коомунун төрагасы Калык Мамбетакунов өзү да, коомдун жетекчилиги да батир албаганын билдирди. Анын айтымында, Мамбетакуновдун турак жайды бөлүштүрүүгө укугу жок, төрага болгону профсоюз менен ишкана жамааттарынын чечимдерин бекитип берет.
"Нормативдерге ылайык, коомдо майыптардын саны 51 пайыздан кем болбош керек, бирок бизде алар 75 пайыздан ашык. Совет доорунда батирлердин 55 пайызын майыптар алышы керек болчу. Азыр биз жобону өзгөртүп, батирлердин 90 пайызын майыптар алса, 10 пайызын гана дени сактар алууда", — деди ал.
Мамбетакунов батирлердин саны ага муктаж болгондордун санынан бир топ эле аз экенин айтат. Ошондой эле митингге чыккандардын айрымдары дагы батир алыш үчүн үйү бар экенин жашырууда.
