БИШКЕК, 18-май — Sputnik. Кыргызстандын Алматы шаарындагы Башкы консулдугунун кызматкерлери кыргыз диаспорасынын өкүлдөрү менен Енбекшиказак районунун Шелек аймагынын талааларында иштеген КР жарандары менен жолугуп, турмушунан кабар алышты. Бул тууралуу Тышкы иштер министрлиги билдирди.
Маалыматка ылайык, сапар КР жарандарынын жашоо-шарты жана жумуш орду менен жакындан таанышуу максатын көздөйт.
"Жолугушуу учурунда кыргызстандыктар эл аралык мыйзам ченемдери, негизинен Евразиялык экономикалык биримдик тууралуу келишим тууралуу маалымат алышты. Мындан тышкары, мигранттар Казакстанда кездешкен көйгөйлөрү тууралуу айтышты. Консулдуктун кызматкерлери жарандарга укуктук жактан кеп-кеңештерин беришти", — деп айтылат билдирүүдө.
Муну менен бирге консулдуктун кызматкерлери кыргызстандыктарды жумуш менен камсыз кылган фермерлер менен жолукту. Мында дипломатиялык кызматкерлер КР жарандарына сый-урмат менен мамиле кылуу, алардын Казакстанда жүрүүсүн мыйзамдаштырууга жардам берүү боюнча маселелер талкууланды.
