АНКАРА, 18-май — Sputnik. Стамбулдагы атайын опеарация учурунда "Ислам мамлекети" террордук уюмуна тиешеси бар деген шек менен 10 киши кармалды. Бул туурасында Hurriyet басылмасы билдирди.
Полициянын террорчулукка каршы бөлүмүнүн кызматкерлери Стамбул шаарында бир учурда эле он дарек боюнча — Султангази, Эсенйурт, Эсенлер жана Султанбейли райондорунда атайын тик учактар менен операцияларды жүргүзгөн. Бийлик кармалгандардын арасында жардырууларды даярдоо менен алектенген беш киши кармалгандыгын билдирди.
Буга чейин Түркиянын чалгындоо кызматы 19-май — Жаштар жана спорт күнү болгон улуттук майрамда Анкарада теракт болушу мүмкүндүгүн кабарлаган. Басылманын түрк атайын кызматтарындагы булактарына таянып билдиргенине караганда, Кемал Ататүрктүн мавзолейи, АКШнын элчилиги жана аскер бөлүктөрдүн бири бутага алынган.
