БИШКЕК, 18-май — Sputnik. Биринчи вице премьер-министр Мухамметкалый Абулгазиев Ош облусунда иш сапары менен жүрөт. Бул туурасында өкмөттүн маалымат кызматынан кабарлашты.
"Премьер-министр Сооронбай Жээнбековдун тапшырмасы менен Абулгазиев Ош облусунда жүрөт. Ал бир нече социалдык курулуштардын жүрүшү, фитосанитардык лаборатория менен таанышып, жазгы-талаа жумуштарынын жүрүшүнөн кабар алат", — деп билдирди маалымат кызматынан.
Учурда ал Жийделик айылында Казакстандын каражатына салынып жаткан 500 орундуу мектептин курулушу менен таанышууда.
Мындан сырткары, Абулгазиев Кара-Суу районундагы Чайчы айылындагы жер титирөөдөн жабыркаган жарандар менен жолугуп, Ош шаардык фитосанитардык лабораторияга, Ош аймактык ветфитоинспекцияга барат.
Түшкө жуук ӨКМдин имаратында жазгы-талаа жумуштары боюнча селектордук жыйын өткөрөт.
