БИШКЕК, 5-май — Sputnik. Талас облусунда ЗАГС кызматкерлери өлгөн адамдын күбөлүгүн өзгөртүүгө шектелип жатат. Бул тууралуу Ички иштер министрлигинен билдиришти.
Маалыматка ылайык, 74 жаштагы аял 2015-жылдын февраль айында көз жумган. Бирок ошол эле жылдын жай айларында ЗАГС кызматкерлери анын күбөлүгүндөгү маалыматтарды туугандарына өзгөртүп беришкен.
Алдын ала маалыматтар боюнча, мүлк талаш маркумдун Казакстанда жашаган кызынын капыстан пайда болуп, бардык документтерди өзүнө каттап кайра жок болуп кеткенден кийин башталган.
Ал эми маркум тирүү кезинде баккан үй-бүлөгө бардык мүлкүн бере турганын айтканы менен кагаз жүзүндө өткөрүп берген эмес.
Мындан улам туугандары ЗАГСтан жасалма күбөлүк жасатуу менен сотко кайрылып, маселени өз пайдаларына чечүүнү көздөшкөн.
Учурда аталган факты боюнча Талас облусунун прокуратурасы тарабынан Кылмыш жаза Кодексинин 350-беренеси (жасалма документ жасоо) менен кылмыш иши козголду. Тергөө иштери уланууда.
