БИШКЕК, 11-май — Sputnik. Мыйзам бузуп, тасмага түшүп калган милиция кызматкерине 1000 сом айып салынды. Бул тууралуу Ички иштер министрлигинин алдындагы Мамлекеттик күзөт башкы башкармалыгынан билдиришти.
"Мамлекеттик күзөт кызматынын Жайыл райондук бөлүмүнө 25-апрель күнү саат 10:30да билдирүү түшкөн. Анын негизинде атайын экипаж тез арада жөнөп кеткен. Бул тууралуу каттоо журналына жазылган", — деп айтылат маалыматта.
Ошол эле күнү саат 9:25де темир жолунун №3718 бөлүгү оңдоп түзөө иштери үчүн жабылган.
"Убакыттын аздыгынан жана тез арада жардамга жетип баруу максатында милиция кызматкери аталган кадамга барган", — деди маалымат кызматы.
ИИМдин билдиришинче чакырууга ыкчам бара жаткан милиция кызматкери атайын белгисин жагуусу керек эле. Бирок ал анткен эмес.
Аталган жол эрежесин бузгандыктан милиция кызматкерине 1000 сом айып салынды.
