БИШКЕК, 11-май — Sputnik. Гапар Айтиев атындагы көркөм сүрөт музейинде 114 буюмдун жок экендиги аныкталды. Бул тууралуу Эсеп палатасы 2014-жыл боюнча жүргүзгөн финансылык отчеттуулугуна жүргүзүлгөн аудиттин жыйынтыгы менен билдирди.
Аудит музей баалуулуктарды эсепке алуу жана сактоону камсыз кылуу, мыйзам талаптарына туура келбегендигин аныктаган.
"Музейдеги буюмдарды эсепке алуу документинин маалыматтары менен факты жүзүндөгү буюмдардын ортосунда 176 буюмдун ортосунда айырма чыккан, ал эми 47 экспонат эки жолу жаңылыш жазылган", — деп айтылат билдирүүдө.
Инвентаризациялоодо жалпы наркы 941 миң сомдук ашыкча товардык-материалдык баалуулуктар аныкталгандыгы, ал аудиттин жүрүшүндө аталган музейдин балансына кириштелгени аудит тарабынан белгиленген.
Ал эми аталган музейдин директору Юристанбек Шыгаев Sputnik Кыргызстан агенттигине 114 картина өткөн кылымдын 50-80-жылдарында эле жок болгонун айтып берди.
"Алар кагаз жүзүндө гана "жоголгон". Эсеп палатасынын аудиторлору жыл сайын эле ушул маалыматты бере беришет. Текшерүү өткөн сайын аудиторлордун корутундусун Маданият министрлигине көрсөтүп келебиз. Бирок бир да министр мунун жоопкерчилигин моюндагысы келбейт", — деди ал.
Шыгаев аталган экспонаттар жокко чыгарылмайынча Эсеп палатасы текшерген сайын алардын жетишсиздигин аныктай берерин кошумчалады.
