БИШКЕК, 10-май — Sputnik. Кыргызстандын мамлекеттик карызы тийиштүү чектен ашып кетти. Бул тууралуу Өкмөттүн маалымат кызматы билдирди.
Талапка ылайык, мамлекеттик тышкы карыздын көлөмү ички дүң продукциянын 60 пайызынан ашпашы керек.
Үстүбүздөгү жылдын 31-мартына карата Кыргызстандын тышкы карызы 3 миллион 646 миң АКШ долларын же былтыркы ички дүң продукциясынын 60,3 пайызын түзгөн.
Билдирүүдө айтылгандай, жалпы тартылган тышкы насыялардын 99 пайызы жеңилдетилген шартта 0,75-2,0 пайыз үстөк менен 40 жылдык мөөнөткө алынган.
Тышкы карыздын 90 пайыздан ашууну ар кандай инвестициялык долбоорлорду ишке ашыруу үчүн багытталган.
Мындан сырткары, тышкы карыздарды кыскартуу чараларынын негизинде АКШ — 43,5 миллион доллар, Германия — 13,5, Россия — 30 миллион доллар карызды кечкен.
Учурда мамлекеттик карыз өлчөмүнүн кескин өсүүсүнө жол бербөө чараларын иштеп чыгуу уланууда.
