БИШКЕК, 8-май — Sputnik. Мамлекеттик каттоо кызматы тарабынан эл аралык издөөдө жүргөн уюшкан кылмыштуу топтун мүчөсүнө паспорт берилген. Бул тууралуу Ички иштер министрлигинин маалымат кызматы билдирди.
Бир нече жолу соттолгон жаран ИИМдин маалыматына ылайык уюшкан кылмыштуу топтун мүчөсү катары катталып, адам өлтүрүү, миллиондогон акчаларды тоноо боюнча күнөөлөнүп, 2009-жылы эл аралык издөөгө алынган.
"Кылмышкерди буга чейин кармоого мүмкүн болбой келген. Аны былтыр кармаганыбызда жанында мыйзамсыз алынган паспорт табылган. Кылмышкер анын жардамы менен жашырынып жүргөн",— деп айтылат маалыматта.
ИИМдин билдиришинче Мамлекеттик каттоо кызматынын Чүй облусуна караштуу, Кемин районундагы кызматкерлери 2012-жылы издөөдө жүргөн кылмышкерге башка фамилияга жазылган паспорт берген.
Аталган факт боюнча Кылмыш жаза кодексинин 304 беренеси (кызмат абалынан кыянаттык менен пайдалануу) боюнча кылмыш иши козголуп, тергөө амалдары жүрүп жатат.
