БИШКЕК, 1-май. — Sputnik. Маданият, маалымат жана туризм министрлиги тарабынан Тарых жана маданият жылына карата жарыяланган I Республикалык драмалар сынагы үчүн чыгармаларды кабыл алуу 10-майда токтотулат. Бул тууралуу аталган министрлик билдирди.
Маалыматка ылайык, сынакка кыргыз элинин байыркы замандан ушул мезгилге чейинки басып өткөн жолундагы урунттуу тарыхый окуяларга же инсандарга байланыштуу пьеса, ошондой эле чоң жана кичи эпос, уламыш, жомок, дастандардын негизинде жазылган эпикалык драмалар катышат.
"Буга чейин театрларда коюлган пьесалар сынакка кабыл алынбайт. Мындан тышкары, бир автор бир гана чыгарма менен катышууга укуктуу. Алар кыргыз же орус тилдеринде гана болушу керек", — деп айтылат билдирүүдө.
Мекеме бул драмалар үстүбүздөгү жылдын аягына чейин республиканын мамлекеттик театрларына сахналаштыруу үчүн жиберилерин белгилейт.
