БИШКЕК, 28-апр. — Sputnik. Жалал-Абад облусунун Сузак районундагы Башы тилкесинде жүргөн жер көчкүнүн алдында калган баланын сөөгү табылды. Бул тууралуу ӨКМ билдирди.
Белгилей кетсек, 27-апрелде кечинде саат 18.00дөр чамасында болжол менен көлөмү 1 миллион 600 миң куб метр жер көчкүсү жүрүп, алты турак жайды жана 16 жашар баланы басып калган.
ӨКМден билдиришкендей, куткаруу иштерине 200гө жакын куткаруучулар тартылган.
"Министр Кубатбек Бороновдун тапшырмасы менен министрдин орун басары Равшанбек Рысбаев жетекчилик кылып, 200гө жакын куткаруучулар менен кызматкерлердин издөө иштеринин натыйжасында жер көчкүнүн алдында калган баланын денеси табылды", — деп айтылат билдирүүдө.
Эскерте кетсек, бүгүн 28-апрелде саат 11.00дө Сузакта дагы 2,5 миллион куб метрлик жер көчүп, бир автоунааны басып калган.
