БИШКЕК, 27-апр. — Sputnik. Кыргызстандын футбол боюнча курама командасы акыр-аягына чейин күрөшүүгө даяр. Бул тууралуу улуттук курамдын машыктыруучусу Александр Крестинин Футбол федерациясынын маалымат кызматына интервью берип жатып билдирди.
Машыктыруучу 2018-жылкы дүйнө биринчилигине тандоо оюндарынын алкагында өткөн беттештердин жыйынтыктары тууралуу пикирин билдирди. Улуттук курам сегиз ирет оюн талаасына чыгып, төртөөсүн жеңип, экөөсүндө тең чыккан жана экөөсүндө жеңилүү ызасын таткан.
"Австралияга акыркы секундда гол киргиздик, Иорданияга оюндун бүтүшүнө аз калганда катуу чабуул жасап, Тажикстан менен болгон беттеште төрт секунд калганда теңдешдик. Үч беттеште тең акыркы мүнөттөргө чейин кармашып жаттык. Демек биз аябай тырышчаак, өжөрбүз", — дейт Крестинин.
Ал оюнчулар башка өлкөгө барганда өзүнө ишеним арта албай жатканын кошумчалады.
"Статистикага ылайык ар бир беттеште атаандаштын дарбазасына карай 15 ирет сокку жасайбыз. Бирок дарбазага кирген топторубуз аздык кылууда", — дейт машыктыруучу.
Кыргызстандын футбол боюнча улуттук курамы дүйнөлүк мелдешке болгон тандоо турунда үчүнчү орунду ээлеп, андан аркы таймаштан четтеп калды. Бирок улуттук курам Азия биринчилигинде күч сынашууга толук мүмкүнчүлүгү бар.
