БИШКЕК, 25-апр. — Sputnik. Түркиянын президенти Тайип Эрдоган Константинополдогу Армян Апостол чиркөөсүнүн архиепискобу Арам Атешянга 1915-жылы Осмон империясында болгон кайгылуу окуя боюнча көңүл айтканын РИА Новости билдирди.
Дүйнө жүзүндөгү армяндар 24-апрелди 1915-жылы Осмон империясында болгон тукум курутту эскерүү күнү катары белгилешет.
"Түркия жалпы тарыхы бар, салт-санаасы окшош эки коңшу өлкөнү бири-бирине касташтырып, тарыхты саясатташтыргандарга карата татыктуу жооп берип, тынчтык жана достукту чыңдоого аракеттерди көрөт. Андыктан мен каза болгон осмон армяндарын эскерип, алардын жакындарына көңүл айтам… Түрктөр менен армяндардын кылымдар бою эриш-аркак жашап келгенин эстен чыгарбайбыз", — деп айтылат өлкө башчынын катында.
Расмий Анкара 1915-жылы армяндардын тукум курут болушу тууралуу маалыматты четке кагып, анда армяндар менен чогуу түрктөр дагы кырылганын айтып келет. Ал эми Армения Осмон империясындагы бул ишти армяндардын тукум куруту катары дүйнө эли таануусу керектигине басым жасайт. Армяндардын тукум курут болгонун бир катар мамлекеттер да тааныган. Анын ичинде Европарламент жана чиркөөлөрдүн дүйнөлүк кеңеши да бар.
