БИШКЕК, 25-апр. — Sputnik. Бүгүн кечинде "Ак Илбирс" фестивалында ат салыша турган тасмалардын кыска тизмеси жарыялана турганын Кинематографисттер союзунун уюштуруу комитетинин катчысы Талант Төлөбеков билдирди.
Анын айтымында, бүгүн саат 17.30да калыстар тобунун жыйыны өтүп, конкурстук программага кирген фильмдер аныкталат.
Аталган сыйлыкка 2015-жылы өндүрүштөн чыккан ар кыл жанрдагы тасмалар ат салышат. Мындан төрт жыл мурун негизделген иш-чара 14 номинация боюнча мыктыларды аныктап келсе, былтыртан баштап Борбордук Азияны толугу менен камтып, ага дагы эки номинация кошулган.
Сыйлык тапшыруу аземи 15-майда "Манас" кинотеатрында өтөт.
Sputnik Кыргызстан маалымат агенттиги жана радиосу — "Ак Илбирс" киносыйлыгынын эл аралык маалыматтык өнөктөшү.
