БИШКЕК, 23-апр. — Sputnik. Бүгүн Кыргызстандын аймагында эки ирет жер титиреди. Бул тууралуу Өзгөчө кырдаалдар министрлигинин маалымат кызматы билдирди.
"Саат 12.41де Ысык-Көл облусуна караштуу Тогуз-Булак айылына жакын жерде күчү төрт баллга жеткен жер силкинүү катталды", — деп айтылат маалыматта.
Алдын ала маалыматтар боюнча, силкинүү очогу Кыргызстандын Тескей-Ала-Тоо тоолорунда катталган. Жабыркагандар жок.
Экинчи жер титирөө саат 14.53дө катталып, күчү 4,5 баллга жеткен.
Маалыматта айтылгандай, силкинүү очогу Жалал-Абад шаарынан 30 чакырым аралыкта жайгашкан Кыргызстан менен Өзбекстандын чек арасында катталган. Жабыркагандар жок.
