БИШКЕК, 22-апр. — Sputnik. Жыл башынан бери өтүп келе жаткан Театрлар таймашынын алтынчы этабында Чыңгыз Айтматов атындагы мамлекеттик орус драма театры менен Арсен Өмүралиев атындагы Бишкек шаардык драма театры беттешет. Бул тууралуу Маданият, маалымат жана туризм министрлиги билдирди.
Актёрлор Айтматовдун "Кыямат", Шекспирдин "Ромео жана Жульетта", Бомаршенин "Фигаронун үйлөнүүсү" драмаларынан үзүндү коюшат.
Биринчисинде "Учур" менен беттешкен Жаштар театры жеңишке жетишсе, экинчисинде Улуттук драма театры менен ат салышкан Чүй облустук театры озуп кеткен.
Андан кийинки этаптар 13-14-апрель күндөрү Ош шаарындагы Бабур атындагы өзбек театрында өтүп, аталган мекеме Алай райондук театрын жеңип алган. Төртүнчүсүндө Талас облустук театрын кабыл алган Ош облустук театры алдыга чыккан. Ал эми кийинкисинде Баткен облустук театры менен ат салышкан Жалал-Абад облустук театры жеңишке жеткен.
Маалыматка ылайык, таймаштын алтынчы этабы Чыңгыз Айтматов атындагы мамлекеттик орус драма театрында 24-апрель күнү саат 18.00дө өтөт.
