БИШКЕК, 19-апр. — Sputnik. Казынанын акчасына суук колун салган же 463 миң доллардан өйдө пара алган мамлекеттик кызматкерлер келтирген ири зыяны үчүн дароо өлүм жазасына тартылат. Бул туурасында Синьхуа маалымат агенттиги жазды.
Мындай маалыматты камтыган документ Кытайдын Элдик Жогорку прокуратурасы менен Элдик Жогорку Сотто жарыя кылынды.
Өлүм жазасы өтө катаал өкүм деп эсептелген учурда, күнөөлөнүп жаткандардын мөөнөтү кыскарбай же абактан эрте бошотулбай, өмүр бою түрмөгө отуруу жазасына тартылышы мүмкүн.
Документте кылмыш жообуна тартыла турган коррупционерлердин мыйзамсыз делген кирешелери белгиленген. Алгачкы сумма — 30 миң юанга чейин, ири көлөмдөгүсү 200 миңден 3 миллион юань, ал эми өтө ири дегени 3 миллион юандан өйдө деп аныкталган.
Документтерге ылайык, Кытайдын сот органдары паракорлукка жазаны айып пул түрүндө да салат. Ал үчүн айып пулдардын деңгээли аныкталып, башка кылмыштарга караганда катаал болот. Мыйзамсыз жол менен табылган каражат менен мүлктөрдүн бардыгы конфискацияланат.
