БИШКЕК, 12-апр. — Sputnik. Президент Алмазбек Атамбаев унааларды эвакуациялоого мажбурлоо жөнүндө мыйзам долбооруна кол койду. Бул тууралуу өлкө башчынын маалымат кызматы билдирди.
Аталган мыйзам Жогорку Кеңеш тарабынан 3-мартта кабыл алынган.
Ага ылайык, эми Кыргызстанда "Эвакуатор" аттуу жаңы жол белгиси киргизилет. Ал жолдун көйгөйлүү аймактарына орнотулмакчы. Бул белгинин жанына токтотулган унаалар эвакуацияланат.
Административдик жоопкерчилик боюнча кодекске "Унаа каражатын мажбур эвакуациялоо" боюнча 568-берене киргизилип, ал эми 235-беренеге эвакуациялоо тартиби өкмөт тарабынан бекитилери тууралуу толуктоолор кирди.
Мыйзам жарыялангандан 10 күн өткөндөн кийин күчүнө кирет.
