Апрель алааматы: 7-апрелде жараат алгандардын бири каза болуп, бүгүн жерге берилди

БИШКЕК, 7-апр. — Sputnik. Апрель революциясында "Ала-Тоо" аянтында жараат алган Отор Абдрахманов каза болуп, бүгүн, 7-апрелде жерге берилди. Бул тууралуу "Айкөл Ала-Тоо" коомдук бирикмесинин төрагасы, депутат Мээрбек Мисканбаев Sputnik Кыргызстан агенттигине билдирди.

Анын айтымында, ок Абдрахмановдун бутуна тийген. Жарааты күчөп отуруп, акыры жанын алып тынды, дейт депутат. 

"Бүгүн Апрель баатыры Отор Абдрахмановду акыркы сапарга узатуу зыйнаты болуп жатат. Ал кандуу революцияны жасагандардын сап башында турган", — деди Мискенбаев. 

"Айкөл Ала-Тоо" коомдук бирикмесинин мүчөсү Жоомарт Дүйшөмбиевдин айтымында, Абдрахманов алты жыл бою алган жараатынан улам кыйналып келген. 

"Отор Абдрахманов 41 жашында каза болду. Ал 2010-жылы 7-апрелде саат 17:30дар чамасында Чүй проспектиси менен Панфилов көчөсүнүн кесилишинде ок жеп, эки күндөн соң ооруканага кайрылган. Анын сөөгү туулуп өскөн Кочкор районуна караштуу Ормон хан айылында жерге берилди", — деди Дүйшөмбиев. 

Абдрахмановдун көз жумушу менен апрель революциясында каза болгондордун саны 123 кишиге жетти.