БИШКЕК, 2-апр. — Sputnik. Абдылас Малдыбаев атындагы опера жана балет театрынын солисти Тилек Найманбаев жаш вокалисттердин Бүткүл россиялык сынагында экинчи орунду ээледи. Бул тууралуу аталган театр билдирди.
Маалыматка ылайык, белгилүү опера ырчысы Надежда Обухованын атындагы конкурс 28-31-март күндөрү Липецк шаарында болуп өттү.
Сынакка арыз берген 382 өнөрпоздун ичинен уюштуруучулар 36 вокалистке гана чакыруу бергенин Тилек Найманбаев өзү айтып берди.
"Сынактын жыйынтыгы үч тур менен чыкты. Жалпы жонунан сегиз чыгарма аткардык. Дүйнөлүк классикадан тышкары Калый Молдобасановдун "Селкиге" аттуу чыгармасын тартууладым", — деди опера ырчысы.
2005-жылдан бери эки жылда бир жолу өтүп келген сынакка быйыл Нидерланды, Улуу Британия, Польша, Монголия, Кыргызстан, Бурятия, Калмыкия, ошондой эле Санкт-Петербург менен Москва шаарларынан өнөрпоздор чакырылган.
Белгилей кетсек, абройлуу конкурска быйыл Кыргызстан биринчи жолу катышты.
