БИШКЕК, 2-апр. — Sputnik. Ош шаарынын Кара-Суу районундагы Ташлак айылында таанышынын үйүнө түндө терезеден кирип, таш менен башка чаап, кекиртегин эки жолу кесип кеткен деп шектелген 22 жаштагы жаран кармалды. Бул тууралуу ИИМдин Ош шаардык жана облустук башкы башкармалыгынын маалымат кызматы билдирди.
Ага ылайык, Ташлак айылында адам мыкаачылык менен өлтүрүлгөнү боюнча билдирүү милицияга 31-мартта кечки саат 9.30дарда келип түшкөн.
"Билдирүү келери менен милиция кызматкерлери окуя болгон жерге барышты. Үйдүн ичинде мыкаачылык менен өлтүрүлгөн 20 жаштагы жарандын сөөгү табылды. Аны таш менен башка чаап, андан кийин учтуу нерсе менен кекиртегин эки жолу кесип кетишкен. Учурда шектүү жаран кармалып, тергөө иштери жүрүүдө", — деп маалымат кызматы билдирди.
Милиция ошондой эле шектүү жаран терезеден кириши мүмкүндүгүн белгиледи. Себеби, үйдүн эшиктери бек болгон, бирок, терезеден бармак издери табылган.
Шектүү жаран мындай ишке өч алыш үчүн барганын айтканын милициядан кошумчалашты.
"Кармалган жаран маркум менен буга чейин эле келишпей жүргөнүн айтууда. Каза болгон бала чымыр денелүү болгондуктан аны учурунда уруп-согуп койгонун билдирди", — дейт милиция өкүлү.
Маркумдун ата-энеси Россияда иштери белгилүү болду.
Учурда окуянын чоо-жайын тергөөчүлөр иликтеп, аталган факты боюнча Кылмыш жаза кодексинин 97-беренесинин (Адам өлтүрүү) негизинде кылмыш иши козголду.
